ភ្នំពេញ៖ នាយករដ្ឋមន្ត្រីកម្ពុជាសម្តេចតេជោ បានបង្ហោះសារក្នុងទំព័រហ្វេសបុកផ្លូវការរបស់សម្តេចដោយសុំអធ្យាស្រ័យករណីការឡើកលើអំពីការដោះលែងជនជាតិអូស្ត្រាលីដែលសម្តេចបានស្នើសុំមេដឹកនាំយោធាមីយ៉ាន់ម៉ា ដែលសម្តេចបានមានប្រសាសន៍កាលពីព្រឹកថ្ងៃទី៧ ខែកុម្ភៈនេះ។

សម្តេចតេជោបានលើកឡើងថា «ព្រឹកមិញខ្ញុំបានលើកឡើងអំពីការដោះលែងជនជាតិអូស្ត្រាលីដែលខ្ញុំបានស្នើសុំមេដឹកនាំយោធាមីយ៉ាន់ម៉ា។ តាមការជាក់ស្តែងជនជាតិអូស្ត្រាលីនេះមិនទាន់ទទួលបានការដោះលែងនៅឡើយទេ។ ការភ័ន្តច្រឡំនេះបណ្តាលមកពីខ្ញុំទទួលបានព័ត៌មានខុសដែលខ្ញុំសូមអធ្យាស្រ័យលើកំហុសដោយអចេតនាមួយនេះ»។

ភ្លាមៗបន្ទាន់ពីការចេញសារខាងនេះ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៅយប់ថ្ងៃទី៧ ខែកុម្ភៈនេះ បានចេញសេចក្តីបំភ្លឺបន្ទាប់ពីការប្រកាសដោយសម្តេចតេជោនាយករដ្ឋមន្ត្រី នៅក្នុងពិធីសម្ពោធដាក់ឱ្យប្រើប្រាស់កំណាត់ ផ្លូវជាតិលេខ៧ ក្នុងខេត្តក្រចេះ នៅព្រឹកនេះ ពាក់ព័ន្ធនឹងការដោះលែងលោកសាស្ត្រាចារ្យ សន ធើនណល ជនជាតិអូស្ត្រាលីដែលជាប់ឃុំឃាំងនៅមីយ៉ាន់ម៉ា មានការស្វែងរកការបញ្ជាក់ជាច្រើនលើ។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបំភ្លឺថា «ការប្រកាសនេះគឺដោយសារការផ្តល់ព័ត៌មានខុស ហើយលោកសាស្ត្រាចារ្យ សន ធើនណល នៅបន្តជាប់ឃុំឃាំងដដែល»។

អ្នកនាំពាក្យបានឱ្យដឹងថា នេះគឺជាហេតុការណ៍កើតឡើងដោយអចេតនា និងបានរំលឹកថា «នៅក្នុងកិច្ចពិភាក្សាជាមួយ នាយឧត្តមសេនីយ៍ជាន់ខ្ពស់ មីន អោង ឡាំង សម្ដេចតេជោនាយករដ្ឋមន្ត្រី បានលើកពីករណីលោកសាស្ត្រាចារ្យ សន ផេនណល ហើយទទួលបានការធានាពីនាយឧត្តមសេនីយ៍ជាន់ខ្ពស់ថា គាត់នឹងពិចារណាករណីនេះឡើងវិញបន្ទាប់ពីដំណើរការតុលាការត្រូវបានបញ្ចប់»។

ជាទីប្រឹក្សារបស់អតីតមេដឹកនាំមីយ៉ាន់ម៉ាលោកស្រី អោង សាន ស៊ូ ជី គឺលោក Turnell ជាជនជាតិអូស្រ្តាលី ត្រូវបានគេចាប់ខ្លួនកាលពីខែកុម្ភៈ ឆ្នាំមុន ក្រោយការផ្ទុះរដ្ឋប្រហារយោធា។ លោក Turnell គឺសាស្រ្តាចារ្យផ្នែកសេដ្ឋកិច្ច លោកត្រូវបានរងការចោទប្រកាន់ពីបទបំពានច្បាប់ការពារព័ត៌មានសម្ងាត់រដ្ឋរបស់មីយ៉ាន់ម៉ា ដែកកំពុងប្រឈការដាក់ទោសជាអតិបរមាជាប់ពន្ធនាគាររយៈពេល១៤ឆ្នាំ៕